६३९ पटक हेरिएको
पथरी ।सञ्चार क्लब नेपाल उर्लाबारीको २१ औं वार्षिक साधारणसभामा ४ जना पत्रकारलाई सम्मान गरिएको छ । मोरङको मिक्लाजुङ्ग गाउँपालिका वडा नं २ स्थित कुईनेटारमा बिहिवार सम्पन्न वार्षिक साधारणसभामा सञ्चार क्षेत्रमा उल्लेख्य योगदान पुर्याउने ४ जना पत्रकारलाई सम्मान गरिएको हो ।
सम्मानित हुनेहरूमा सञ्चार क्लब पत्रकारिता सम्मान तथा पुरस्कारबाट संस्थाका संस्थापक अध्यक्ष दुर्गा प्रसाद खतिवडा , लिला तथा गोमा आचार्य स्मृति पत्रकारिता पुरस्कारबाट घनश्याम भण्डारी , दाताराम पद्मावती खतिवडा स्मृति पत्रकारिता पुरस्कारबाट हरि कोईराला रहेका छन् भने दुर्गाराज पोमु लिम्बू स्मृति पत्रकारिता पुरस्कार सरोज बस्नेतलाई प्रदान गरियो ।
सम्मानित सञ्चारकर्मीहरुलाई कार्यक्रमका प्रमुख अतिथि मिक्लाजुङ्ग गाउँपालिकाका अध्यक्ष बबिकुमार राई र अक्षयकोषका दाताहरु दुर्गाप्रसाद खतिवडा , जयधर्म आचार्य र लोलिम पोमु लिम्बूले दोसल्ला सहित नगद र सम्मानपत्र प्रदान गरेका थिए । यस अघि जनही नगद ५ हजार पुरस्कार राशी रहेको पुरस्कार यसपटकबाट अक्षयकोष स्थापना गरि जनही १० हजार प्रदान गरिएको सञ्चार क्लब नेपालका महासचिव तिलक नेपालीले बताए ।
कार्यक्रममा क्लबका महासचिव तिलक नेपालीले प्रगति प्रतिवेदन पेश गरेका थिए भने कोषाध्यक्ष ईश्वर दुलालले आर्थिक प्रतीवेदन पढेर सुनाएका थिए ।
आन्तरिक पर्यटन प्रवर्द्धनको उद्देश्यले नुनसरी खोलाको किनारमा वनभोज सहित आयोजित साधारणसभामा क्लबका अध्यक्ष कुमार खड्काको सभापतित्व रहेको थियो भने सञ्चालन महासचिव तिलक नेपालीले गरेका थिए ।
