३०७ पटक हेरिएको
विराटनगर।जनजाती कल्याण आश्रम नेपाल अन्तर्गतको आमाको माया छात्रावास, विराटनगरलाई ३० भन्दा बढी दाताहरूले आर्थिक सहयोग गरेका छन् । छात्रावासमा अध्ययनरत ३० जना विद्यार्थीलाई एक जना दाताले वार्षिक २५ हजार रुपैयाँका दरले सहयोग गरिरहेका छन् ।
माघे सङ्क्रान्तिको अवसरमा मंगलबार आयोजित छात्रावासको वार्षिकोत्सव एवं सामूहिक खिचडी वितरण कार्यक्रममा विद्यार्थीहरूलाई सहयोग गर्ने दाताहरूको नाम सार्वजनिक गरिएको हो । सुरेन्द्र गोल्छा, रतन मदन पुरिया, राजेश सिंह लगायतका विभिन्न व्यक्ति तथा संस्थाले छात्रावासलाई आर्थिक सहयोग गरेका छन् ।
छात्रावासका संस्थापक अध्यक्ष शिवरतन जोशीले दाताको सहयोग अपुग भए पनि विराटनगरका विभिन्न दाताहरूबाट खाद्यान्नदेखि तरकारीसम्म निरन्तर सहयोग भइरहेको बताए । उनले यसले गर्दा छात्रावासमा सीमान्तकृत विद्यार्थीहरूले अध्ययन गर्न पाएको बताए ।
कार्यक्रममा नेपाल राष्ट्रिय गीतका लेखक प्रदिपकुमार राई (ब्याकुल माईला) प्रमुख अतिथि थिए । उनले शिक्षा आर्जनका लागि सहयोग गर्ने दाताहरूको प्रशंसा गरे । कार्यक्रममा जनजाती कल्याण आश्रम नेपालका पदाधिकारी, नेपाल पत्रकार महासङ्घ मोरङ शाखाका अध्यक्ष सुशिला पाठक लगायतले मन्तव्य व्यक्त गरेका थिए ।
