बिराटनगर। कोशी प्रदेश प्रहरी कार्यालय बिराटनगरको सभाहलमा सहकर्मीसँग एक पल “Tea With Team” कार्यक्रम तथा “साप्ताहिक प्रहरी कार्यक्रम” को १०० औं भाग प्रसारणको शुभकामना कार्यक्रम सम्पन्न भएको छ। फागुन २३ गते आयोजित कार्यक्रममा प्रहरी नायब महानिरीक्षक राजन अधिकारी प्रमुख अतिथि रहेका थिए।

कार्यक्रममा प्रहरी कर्मचारीहरूलाई नृत्य, कविता तथा हाजिरी जवाफ प्रतियोगिता मार्फत सहभागी गराइयो भने KNOW YOUR FELLOW शृंखलाअन्तर्गत प्रहरी कार्यालय सहयोगी शिव कुमार राई को जीवनीमा आधारित भिडियो क्लिप समेत प्रदर्शन गरियो।

प्रमुख अतिथि अधिकारीले प्रहरी संगठनभित्र आपसी भातृत्व, शिष्टाचार र सकारात्मक वातावरणलाई प्रवर्द्धन गर्न यस्ता कार्यक्रम आवश्यक रहेको बताए। साथै, कोशी प्रदेश प्रहरी कार्यालयले आफ्नै स्टुडियोबाट निर्माण गर्दै आएको साप्ताहिक प्रहरी कार्यक्रम १०० औं भागसम्म निरन्तर प्रसारण गर्न सफल भएकोमा टिमलाई बधाई दिए। उनले प्रहरी कार्यक्रमलाई अझ प्रभावकारी बनाउँदै आम नागरिकमा सचेतना अभिवृद्धि गर्न निर्देशनसमेत दिए।

सो अवसरमा २४ औं अन्तर्राष्ट्रिय महिला दिवसको अवसरमा उत्कृष्ट कार्यसम्पादन गर्ने महिला प्रहरी कर्मचारीहरू तथा हाजिरी जवाफ प्रतियोगिताका विजेता प्रहरी कर्मचारीहरूलाई सम्मान गरिएको थियो। प्रहरी प्रमुख अधिकारीले १०० औं भागको प्रतीकात्मक केक काटेर कार्यक्रमलाई उल्लासपूर्ण रूपमा सम्पन्न गरेका थिए।

कार्यक्रममा प्रहरी वरिष्ठ उपरीक्षक गोबिन्द अधिकारी, प्रहरी उपरीक्षक दिपक पोखरेल, प्रहरी उपरीक्षक हरि डंगोल लगायत प्रहरी अधिकृत तथा प्रहरी कर्मचारीहरूको उपस्थिति रहेको थियो।