१२०३ पटक हेरिएको
पथरीशनिश्चरे।नेपाल रेडक्रस सोसाइटी हसन्दह उपशाखाको आयोजनामा चैत्र ८ गते शुक्रबार हसन्दह स्वास्थ्य चौकीमा खुला रक्तदान कार्यक्रम सम्पन्न भएको छ ।नेपाल रेडक्रस सोसाइटी क्षेत्रीय रक्तसञ्चार सेवा केन्द्र विराटनगरको प्राविधिक सहयोग तथा पथरीशनिश्चरे नगरपालिका वडा नं ५ र ६ को आर्थिक सहयोगमा सम्पन्न भएको कार्यक्रममा ३१ जनाले रक्तदान गरेका छन् ।
नेपाल रेडक्रस सोसाइटी हसन्दह उपशाखाका सभापति भोलानाथ घिमिरेको सभापतित्व रहेको कार्यक्रमको उद्घाटन प्रमुख अतिथि वडा नं ५ का अध्यक्ष चेतन खड्काले गरेका थिए । कार्यक्रममा हसन्दह स्वास्थ्य चौकीका निमित्त प्रमुख यमुना कार्की, वडा नं ५ का वडा सदस्य दिल बहादुर मगर, कार्यपालिका सदस्य तुलसा कार्की , अस्थायी प्रहरी चौकी हसन्दहका प्रमुख बालकृष्ण निरौला लगायतको उपस्थिति रहेको थियो।
उद्घाटन कार्यक्रममा बोल्दै प्रमुख अतिथि चेतन खड्काले रक्तदान पुण्यकार्य रहेको उल्लेख गर्दै सबैलाई रक्तदानमा सहभागी हुन आग्रह गरेका थिए भने नेपाल रेडक्रस सोसाइटी हसन्दह उपशाखाका सचिव लक्ष्मीप्रसाद सुवेदीले मानव सेवाको भावना अनुसार हसन्दह उपशाखाले प्रत्येक वर्ष खुला रक्तदान कार्यक्रम आयोजना गर्दै आएको जानकारी दिएका थिए । पटक–पटक उत्कृष्ट उपशाखाको रूपमा पुरस्कृत रेड्क्रसको हसन्दह उपशाखाले रगतको आवश्यकता परेका बिरामीहरूलाई निःशुल्क रगत उपलब्ध गराउन शिफारिस तथा सहजीकरण गर्दै आएको छ ।
