३४६२ पटक हेरिएको
मोरङ। मोरङको सुनवर्षी नगरपालिका–४ स्थित महेन्द्र आर्यघाटमा मलामी विश्राम स्थल निर्माण कार्य सम्पन्न भएको छ भने शवदाह स्थल निर्माण तीव्र गतिमा अघि बढिरहेको छ। हिन्दू संस्कारअनुसार मृत्युपश्चात शवलाई दाहसंस्कारका लागि आर्यघाटमा ल्याइने परम्परा छ। तर विशेष गरी वर्षायाममा शवदाह गर्न कठिनाइ हुने भएकाले उचित व्यवस्थापन आवश्यक ठहरिँदै आएको छ।
यसै कारण शवदाह स्थल निर्माणलाई प्राथमिकता दिइएको वडा अध्यक्ष छेदिलाल यादवले जानकारी दिए। उनका अनुसार निर्माण कार्य सम्पन्न भएपछि सुनवर्षी नगरपालिका–१, २, ३, र ४ का करिब ४ हजारभन्दा बढी नागरिक लाभान्वित हुने अनुमान गरिएको छ।
वडा अध्यक्ष यादवकै पहलमा सुरु भएको यो आयोजनाका लागि कोशी प्रदेशको सामाजिक विकास मन्त्रालयबाट ५ लाख तथा सुनवर्षी नगरपालिका वडा नं ४ बाट २ लाख बजेट विनियोजन भएको छ। यसबाहेक मलामी विश्राम स्थल निर्माणका लागि सामाजिक विकास मन्त्रालयको ४ लाख बजेटको २० प्रतिशत (८० हजार) तथा सुनवर्षी नगरपालिका वडा नं ४ बाट २ लाख २५ हजार थप गरिएको छ।
स्थानीय समुदायलाई सहजता प्रदान गर्ने उद्देश्यले अगाडि बढाइएको यो आयोजनाले धार्मिक एवं सांस्कृतिक आवश्यकताहरू पूरा गर्दै दाहसंस्कार प्रक्रियालाई व्यवस्थित बनाउने अपेक्षा गरिएको छ।
