१७८९ पटक हेरिएको
विराटनगर। नेपाल अग्रवाल सभा विराटनगरले शनिबार भव्य समारोहको आयोजना गरी ५१४८ औँ अग्रसेन जयन्ती मनाएको छ। यस अवसरमा अग्रवंश कुल प्रवर्तक महाराजा अग्रसेनको जन्मजयन्तीलाई भव्य रूपमा मनाउन विभिन्न कार्यक्रमहरू आयोजना गरिएका थिए।
विशेष सभामा प्रा.डा. जगदिश अग्रवाल, रंगेली नगरपालिकाका मेयर दिलिप बगडिया (अग्रवाल), नेपाल अग्रवाल सभा विराटनगरका निवर्तमान अध्यक्ष अभिषेक तोदी, पूर्वअध्यक्ष उद्योगी एवं समाजसेवी देवकीनन्दन अग्रवाल, नेपाल राष्ट्रिय मारवाडी परिषदका केन्द्रिय उपाध्यक्ष भिखमचन्द सरल, मारवाडी सेवा समिति विराटनगरका अध्यक्ष गोविन्द झुनझुनवाला लगायतका विशिष्ट व्यक्तिहरूको उपस्थिति रहेको थियो।
सभामा बोल्दै नेपाल अग्रवाल सभा विराटनगरका अध्यक्ष राजकुमार अग्रवालले अग्रसेन महाराजको आदर्शलाई आत्मसात गर्दै समाज सेवामा लाग्न सबैलाई आह्वान गरे। उनले अग्रवाल समुदायको एकता र भातृत्वलाई प्रवर्द्धन गर्न यस्ता कार्यक्रमहरूको आयोजना गर्नु आवश्यक रहेको बताए।
विशेष सभा पछि आयोजित सामुहिक गोठप्रसाद ग्रहण कार्यक्रममा विराटनगरमा बसोबास गरिरहेका हजारौँ नेपाल अग्रवाल समुदायका व्यक्तिहरूले भाग लिएका थिए। यसैगरी, शनिबार बिहान विराटनगरमा निकालिएको शोभायात्राले नगर क्षेत्रको परिक्रमा गरेको थियो।
नेपाल अग्रवाल सभा विराटनगर, नेपाल अग्रवाल महिला मञ्च विराटनगर, नेपाल अग्रवाल युवा मञ्च विराटनगर र नेपाल अग्रवाल कन्या मञ्च विराटनगरका पदाधिकारीहरूले यस कार्यक्रमको सफल आयोजनाका लागि अथक प्रयास गरेका थिए।
