९३० पटक हेरिएको
काठमाडौं । त्रिभुवन विश्वविद्यालय क्रिकेट मैदानमा मंसिर ६ गते सम्पन्न नेपाल प्रिमियर लिग (NPL) को फाइनल खेलपछि साम्प्रदायिक सद्भाव खल्बलिने र अपमानजनक व्यवहार गर्ने दुई व्यक्तिलाई प्रहरीले नियन्त्रणमा लिएको छ।
जनकपुर बोल्ट्स र सुदूरपश्चिम रोयल्सबीचको खेल सम्पन्न भएलगत्तै केही व्यक्तिहरूले आपत्तिजनक शब्द प्रयोग गर्दै सामुदायिक सद्भावमा खलल पुर्याउने प्रयास गरेका थिए। यस घटनासँग सम्बन्धित उजुरी र पीडितहरूको जाहेरीका आधारमा अनुसन्धान गर्दै प्रहरीले दुईजनालाई मंसिर ७ गते साँझ ७ बजे पक्राउ गरेको हो।
पक्राउ परेका व्यक्तिहरूमा डोटी आदर्श गाउँपालिका–२ का २१ वर्षीय अशोक साउद र डोटी दिपायल सिलगढी नगरपालिकाका १९ वर्षीय गणेश साउद रहेका छन्। अशोक हाल काठमाडौं कीर्तिपुर नगरपालिका–८ पाँगामा बस्दै आएका थिए भने गणेश कीर्तिपुर–७ भाजङगलमा बसोबास गर्दै आएका थिए।
प्रहरी वृत्त कीर्तिपुरका अनुसार पक्राउ परेका दुई व्यक्तिलाई थप अनुसन्धानका लागि हिरासतमा राखिएको छ। घटनामा संलग्न अन्य व्यक्तिहरूको खोजी कार्य पनि जारी रहेको प्रहरीले जनाएको छ।
नेपाल क्रिकेट संघको आयोजनामा भएको यस प्रतियोगितामा जनकपुर बोल्ट्सले सुदूरपश्चिम रोयल्सलाई पराजित गर्दै उपाधि जितेको थियो। खेलपछि उत्साहित भीडको केही समूहले साम्प्रदायिक तनाव फैलाउने र व्यक्तिगत गालीगलौज गर्ने जस्ता गतिविधि गरेको आरोप लागेको हो।
यस घटनाले खेलप्रतिको उत्साहलाई हिंसात्मक रूपमा प्रस्तुत गर्नु गलत भएको र सामुदायिक सद्भाव कायम राख्न खेलप्रेमीहरूले संयमित रहनुपर्ने आवश्यकतालाई उजागर गरेको छ। स्थानीय प्रशासन र प्रहरीको सक्रियताले विवाद थप गम्भीर बन्न नपाएको बताइएको छ। घटनाको अनुसन्धान र अन्य दोषीको पहिचानपछि प्रहरीले थप विवरण सार्वजनिक गर्ने बताएको छ।
