१६६१ पटक हेरिएको
बिराटनगर ।मारवाडी समाज बिराटनगरकै परिचित तथा अग्रणी युवा संस्था मारवाडी युवा मञ्च बिराटनगरले आगामी शुक्रबार आफ्नो साधारण सभा आयोजना गर्ने भएको छ। साधारण सभाले आगामी कार्यकालका लागि नयाँ अध्यक्ष चयन गर्नेछ।
नयाँ नेतृत्वका लागि वर्तमान प्रथम उपाध्यक्ष मोहित लालवानीले अध्यक्ष पदमा आफ्नो दावेदारी प्रस्तुत गरेका छन्। विगत एक दशकभन्दा बढी समयदेखि संस्था सक्रिय रुपमा लागेका लालवानीले एक कार्यकाल सदस्य, दुई कार्यकाल महासचिव, एक कार्यकाल द्वितीय उपाध्यक्ष, तथा प्रथम उपाध्यक्ष हुँदै अध्यक्ष पदमा पुग्ने तयारी गरेका हुन्।
कोरोना महामारीका बेला महासचिवको जिम्मेवारी सम्हाल्दा मारवाडी सेवा समितिबाट सम्मानित भएका लालवानी सामाजिक कार्यमा निरन्तर सक्रिय छन्। उनी तेरापंथ युवक परिषद् बिराटनगरका पूर्वअध्यक्ष तथा हाल नेपाल राष्ट्रिय मारवाडी युवा संगठनका सचिवका रूपमा कार्यरत छन्। साथै, नेपाली कांग्रेसका क्रियाशील सदस्य समेत रहेका उनले सामाजिक कार्यलाई अझ प्रभावकारी बनाउने प्रतिवद्धता व्यक्त गरेका छन्।
लालवानीले अध्यक्ष भएमा विशेष गरी युवा पुस्ताको सक्रियता बढाउँदै समाजसेवाका क्षेत्रमा नयाँ योजनासहित कार्य गर्ने योजना सार्वजनिक गरेका छन्।
